Komisioneri i Lartë i Kombeve të Bashkuara për të Drejtat e Njeriut, Volker Türk, ka paralajmëruar se inteligjenca artificiale mund të bëhet aq e fuqishme sa të përbëjë një kërcënim serioz për njerëzimin. Gjatë një fjalimi në Këshillin e të Drejtave të Njeriut të OKB-së në Gjenevë, Türk bëri thirrje për vendosjen e garancive të forta për sigurinë e inteligjencës artificiale, duke paralajmëruar se veprimi duhet të ndërmerret përpara se të jetë tepër vonë.
“Ndaj shqetësimet e njerëzve të industrisë se inteligjenca artificiale e avancuar mund të përbëjë një rrezik ekzistencial për njerëzimin”, deklaroi Türk.
Ai kërkoi një përpjekje globale për të garantuar sigurinë e sistemeve të avancuara të inteligjencës artificiale, duke theksuar se rregullat duhet të vendosen përpara se teknologjia të arrijë një nivel ku rreziqet të bëhen të pakontrollueshme.
Türk paralajmëroi gjithashtu për përqendrimin e jashtëzakonshëm të fuqisë në duart e një numri shumë të vogël njerëzish dhe kompanish që po udhëheqin zhvillimin e inteligjencës artificiale.
“Duhet të pranojmë se, në duart e vetëm disa njerëzve, ndodhet një fuqi pothuajse e pakufizuar mbi inteligjencën artificiale”, tha ai, pa përmendur emra konkretë.
Sipas tij, vendet ku janë të përqendruara kompanitë kryesore të AI-së, si dhe shtetet që marrin pjesë në zinxhirët e furnizimit të kësaj teknologjie, duhet të bashkëpunojnë për përcaktimin e kufijve të qartë.
“Minimalisht, vendet që presin zhvillimin e inteligjencës artificiale dhe ato që janë të përfshira në zinxhirët e saj të furnizimit duhet të bashkohen rreth kufijve të përbashkët dhe të panegociueshëm”, u shpreh Türk.
Paralajmërimet e zyrtarit të lartë të OKB-së vijnë në një kohë kur edhe drejtues të kompanive më të mëdha të teknologjisë kanë ngritur shqetësime për rreziqet afatgjata të inteligjencës artificiale. Mes tyre është edhe Sam Altman, drejtuesi i OpenAI, i cili ka folur më herët për mundësinë që zhvillimi i pakontrolluar i AI-së të krijojë rreziqe serioze për njerëzimin.
Kombet e Bashkuara kanë bërë thirrje për harmonizimin e rregullave ndërkombëtare për inteligjencën artificiale, me synim reduktimin e rreziqeve që lidhen me zhvillimin dhe përdorimin e saj.
Në korrik, OKB organizoi edhe takimin e parë global të fokusuar në qeverisjen e inteligjencës artificiale, në përpjekje për të krijuar një qasje të përbashkët ndërkombëtare ndaj një prej teknologjive që po ndryshon me shpejtësi ekonominë, sigurinë dhe shoqërinë.
Paralajmërimi i Türk vjen ndërsa zhvillimi i modeleve gjithnjë e më të avancuara të AI-së po përshpejtohet dhe debati ndërkombëtar për kontrollin, sigurinë dhe përgjegjësinë ndaj kësaj teknologjie po bëhet gjithnjë e më i fortë. Top Channel