Lajme Zone
Dhunohet sërish barbarisht nga policia aktivisti Lulzim Gjini, dërgohet me ambulancë në spital
PolitikëJOQ Albania

Dhunohet sërish barbarisht nga policia aktivisti Lulzim Gjini, dërgohet me ambulancë në spital

Aktivisti Lulzim Gjini është përfshirë sërish në një episod dhune gjatë protestës së kësaj të marte para Kryeministrisë. Këtë herë, pas shoqërimit me forcë nga efektivët e policisë, ai ka përfunduar në spital për të marrë ndihmë mjekësore.

Aktivisti Lulzim Gjini është përfshirë sërish në një episod dhune gjatë protestës së kësaj të marte para Kryeministrisë. Këtë herë, pas shoqërimit me forcë nga efektivët e policisë, ai ka përfunduar në spital për të marrë ndihmë mjekësore.

Në pamjet e mbërritura në redaksinë e JOQ Albania shihet momenti kur efektivët e kapin Gjinin dhe e shoqërojnë me forcë drejt Komisariatit nr. 1. Por ajo që ndodhi më pas brenda ambienteve të komisariatit është edhe më shqetësuese.

Sipas dëshmisë së një protestueseje, e cila thotë se ka qenë e pranishme dhe ka parë ngjarjen, aktivisti është goditur dhunshëm nga efektivët. Ajo tregon se pak pas mbërritjes së tij në komisariat është kërkuar ambulanca, e cila ka mbërritur në ambientet e këtij institucioni për ta transportuar drejt spitalit.

Edhe pamjet e siguruara nga JOQ Albania tregojnë ambulancën në ambientet e komisariatit dhe momentin kur bëhen përgatitjet për transportimin e Gjinit drejt spitalit.

Ky nuk është episodi i parë i dhunës ndaj aktivistit. Më 24 tetor, gjatë një proteste tjetër, Gjini u filmua i shtrirë në tokë, ndërsa një efektiv i forcave “Shqiponja”, Ardit Kasapi, shihej duke e goditur me shkop gome. Një ditë më vonë, Policia e Shtetit njoftoi pezullimin e Kasapit nga detyra dhe nisjen e hetimit administrativ ndaj tij.

Sot, pavarësisht se protesta ishte paqësore, sipas dëshmitares, Gjini është përballur sërish me dhunë nga efektivët, për të përfunduar më pas në spital.

Dy episode, i njëjti qytetar dhe sërish pamje që kërkojnë përgjigje. Çfarë ndodhi me Lulzim Gjinin brenda Komisariatit nr. 1 dhe kush mban përgjegjësi për gjendjen që e bëri të nevojshëm transportimin e tij me ambulancë?