Deputetja e Parlamentit të Austrisë, Gudrun Kugler ka reaguar për protestat që po zhvillohen në Shqipëri dhe ka dënuar raportimet për përdorim joproporcional dhe të paligjshëm të forcës ndaj protestuesve, përfshirë të rinjtë dhe të miturit. Në një reagim në rrjetet sociale, Kugler thekson se protesta paqësore është një e drejtë themelore që duhet respektuar plotësisht. Sipas saj, të rinjtë që dalin në rrugë për të kërkuar llogaridhënie, fundin e korrupsionit dhe një të ardhme në vendin e tyre meritojnë të dëgjohen dhe jo të përballen me forcën.
Ajo shprehet se ka mbërritur edhe informacion për gjoba dhe intimidim ndaj studentëve dhe familjarëve të tyre, për shkak të ushtrimit të të drejtave të tyre, ndaj i ka cilësuar këto praktika të papranueshme.
Nga ana tjetër, ajo kritikon edhe dekretet që cenojnë lirinë e shprehjes dhe të tubimit, ndaj ka theksuar se ato nuk përputhen me standardet moderne të të drejtave të njeriut.
“Protesta paqësore është një e drejtë themelore, e cila duhet të respektohet plotësisht. Të rinjtë që dalin në rrugë për të kërkuar llogaridhënie, fundin e korrupsionit dhe një të ardhme në vendin e tyre meritojnë të dëgjohen, jo të përballen me forcën. U bëj thirrje protestuesve të vazhdojnë të tregojnë vetëpërmbajtje.
Raportimet për përdorim joproporcional dhe të paligjshëm të forcës ndaj protestuesve, përfshirë të rinjtë dhe të miturit, janë thellësisht shqetësuese. Kemi marrë gjithashtu informacione se studentët dhe familjarët e tyre po gjobiten dhe po intimidohen për ushtrimin e të drejtave të tyre, gjë që është po aq e papranueshme. Të gjitha këto pretendime duhet të hetohen menjëherë, në mënyrë të plotë dhe të pavarur, duke respektuar standardet ndërkombëtare të të drejtave të njeriut. Personat përgjegjës duhet të mbajnë përgjegjësi.
Dhuna dhe sulmet ndaj njerëzve dhe pronës nuk kanë vend në një demokraci dhe duhet të dënohen. Dekretet që shkelin lirinë e shprehjes dhe lirinë e tubimit nuk pasqyrojnë standardet moderne të të drejtave të njeriut.
Shqetësimet e ngritura nga protestuesit meritojnë përgjigje të besueshme. E ardhmja e Shqipërisë qëndron në rrugën demokratike dhe europiane, dhe kjo rrugë kërkon shtetin e së drejtës, lirinë e tubimit dhe një luftë serioze kundër korrupsionit.
U bëj thirrje autoriteteve shqiptare, të gjitha palëve të përfshira dhe protestuesve të tregojnë vetëpërmbajtje dhe të veprojnë me përgjegjësi e në mënyrë paqësore. I bëj thirrje policisë t'i japë fund çdo forme intimidimi ndaj protestuesve dhe të angazhohet në një dialog të vërtetë me studentët, pedagogët dhe shoqërinë civile”, shkruan ajo. Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm