David Beckham pritet të shënojë vitin më të suksesshëm financiar të karrierës së tij, me të ardhura të vlerësuara rreth 170 milionë dollarë, sipas raportimeve të mediave britanike.
Ish-ylli i futbollit anglez dhe bashkëshortja e tij, Victoria Beckham, thuhet se kanë një pasuri të përbashkët që arrin rreth 1.185 miliardë dollarë. Një pjesë e madhe e këtij suksesi financiar vjen nga marrëveshjet e shumta komerciale me marka të njohura ndërkombëtare, mes tyre Nespresso, Hugo Boss, Tempur, AliExpress, SharkNinja, Stella Artois dhe PerfectDraft.
Një tjetër faktor që ka ndikuar në rritjen e vlerës së Beckham është investimi i tij në klubin amerikan Inter Miami. Transferimi i Lionel Messit te skuadra amerikane ka rritur ndjeshëm interesin dhe vlerën e klubit, duke sjellë përfitime të mëdha financiare për bashkëpronarët, përfshirë Beckham.
Megjithatë, krahas suksesit në biznes, familja Beckham po përballet me një periudhë të vështirë. Marrëdhënia mes David Beckham dhe djalit të tij, Brooklyn, raportohet se është tensionuar ndjeshëm. Brooklyn ka bërë më herët deklarata publike ku është distancuar nga ajo që ai e quajti “Brand Beckham”, duke pretenduar se kishte ndjerë presion dhe kontroll nga familja.
Sipas raportimeve, përçarja familjare ka vazhduar prej muajsh, ndërsa Brooklyn nuk ka marrë pjesë publikisht në disa momente të rëndësishme familjare. Megjithatë, ndërsa marrëdhëniet personale mbeten të tensionuara, karriera e biznesit të David Beckham vazhdon të shënojë rezultate rekord.