Përshkallëzimi i konfliktit në Lindjen e mesme ka rikthyer përsëri efektin e rritjes së çmimeve të cilat janë reflektuar edhe në Shqipëri.
Sipas të dhënave të INSTAT gjatë muajit korrik niveli I çmimeve në vend pësoi rritje I ndikuar nga karburantet, qiratë dhe ushqimet.
Ndërsa inflacioni në muajin korrik 2026 arriti në 3.4%, nga 2.5% që ishte në të njëjtin muaj të një viti më parë. Po ashtu rritje vërehet edhe nëse shohim nivelin e inflacionit një muaj më parë.
Rritja vjetore e çmimeve në muajin Korrik është ndikuar kryesisht nga grupi “Ushqime dhe pije joalkoolike” me 1,18%, pasuar nga grupi “Qira, ujë, energji elektrike, gaz dhe karburante të tjera” me 0,83% dhe çmimet e grupit “Transporti” me 0,52%.
Kjo pasi gjatë muajit korrik u regjistrua një tjetër shtrenjtim i çmimit të karburanteve e ndikuar nga përshkallëzimi i konfliktit në Lindjen e Mesme duke u shitur me rreth 215 lekë për litër .
Ndwrkohw turizmi dhe rritja e kërkesës për apartamente me qira në platformat Booking apo AirBnB, ka ndikuar në shtrenjtimin e qirave, në korrik.
Pavarësisht rritjes së inflacionit Banka Qendrore e la të pandryshuar normën bazë të interesit në nivelin 2.5% duke argumentuar se kjo situatë do të jetë afatshkurtër. Megjithatë kur inflacioni rritet mbi objektivin e Bankës së Shqipërisë që është 3%, ky institucion reagon për të stabilizuar nivelin e çmimeve.
Ajo mund të shtrëngojë politikën monetare duke rritur normën bazë të interesit, çka shton kostot e kredive, frenon kërkesën për kredi dhe forcon lekun. Por gjithçka tashmë do të varet nga ecuria e nivelit të inflacionit në muajt në vijim. Mos rri jashtë: bashkohu me ABC News. Ne jemi kudo! *KryesoreAktualitet