Gjykata Supreme Federale e Brazilit ka pranuar kërkesën e autoriteteve shqiptare për ekstradimin e Ervin Matës, i kërkuar në Shqipëri për t’iu nënshtruar procesit penal për trafik ndërkombëtar të lëndëve narkotike. Kërkesa e paraqitur nga Qeveria shqiptare ishte shoqëruar me dokumentacionin e nevojshëm dhe, sipas gjykatës, përmbushte kërkesat e përcaktuara nga Ligji brazilian i Migracionit, përfshirë parimin e reciprocitetit. Vendimi është dhënë më 14 shtator 2026.
Sipas vendimit, veprat penale për të cilat kërkohet ekstradimi i Matës përputhen me vepra të parashikuara edhe në legjislacionin brazilian, ndërsa afati i parashkrimit të ndjekjes penale nuk ka përfunduar. Ekstradimi është pranuar mbi bazën e kushteve ligjore, ndërsa përgjegjësia penale e Matës do të shqyrtohet në procesin përkatës. Ai ishte shpallur në kërkim ndërkombëtar që prej nëntorit 2023, pasi Gjykata e Posaçme i kishte caktuar masën “Arrest në burg” për akuzat e trafikimit të lëndëve narkotike në kuadër të grupit të strukturuar kriminal dhe kryerjes së veprave penale nga organizata kriminale.
Sipas hetimeve të autoriteteve shqiptare, Mata dyshohet se ka koordinuar trafikimin e 240 kilogramëve kokainë drejt Frankfurtit në vitin 2020 dhe se ka përfituar 81 milionë lekë nga aktiviteti i paligjshëm. Ai dyshohet gjithashtu për organizimin dhe financimin e vrasjeve dhe për drejtimin e një rrjeti ndërkombëtar të trafikut të kokainës nga Amerika Latine drejt Europës. Mata është i njohur edhe si pronar i një hoteli në “Rrugën e Dibrës” në Tiranë, i cili rezulton i regjistruar në emër të babait të tij.