Kryetari i Grupit Parlamentar të Partisë Socialiste, Taulant Balla, ka përjashtuar mundësinë e dorëheqjes së kryeministrit Edi Rama, pavarësisht kërkesave të studentëve protestues. Në një deklaratë për mediat pas përfundimit të mbledhjes së Grupit Parlamentar të PS-së, Balla u shpreh kategorikisht kundër largimit të kreut të qeverisë. “Dorëheqje të Edi Ramës nuk ka, këtë ta them unë. Të garantoj, nuk ka për të ndodhur”, deklaroi ai.
Balla njoftoi gjithashtu se ligji për tubimet, i prezantuar një ditë më parë nga kryeministri Rama, do të miratohet përmes një akti normativ dhe do të hyjë menjëherë në fuqi. Deklarata vjen në një kohë kur protestat studentore vijojnë dhe kërkesat për largimin e kryeministrit janë në qendër të përplasjes politike.
Kreu i Grupit Parlamentar të PS-së bëri të ditur se në seancën parlamentare pritet të shqyrtohen edhe disa projektligje që lidhen me integrimin europian. Në të njëjtën kohë, ai i bëri thirrje Partisë Demokratike të heqë dorë nga ajo që e cilësoi si “destruktivitet”, duke e zhvendosur përplasjen politike edhe në sallën e Kuvendit, ndërsa mbetet për t'u parë se si do të ndikojë hyrja në fuqi e ligjit të ri mbi zhvillimin e protestave.