Një aksident rrugor është regjistruar në aksin nacional Pushimi i Shoferit–Fier Shegan, pranë daljes së fshatit Rrupaj, ku janë përfshirë dy automjete, njëri me targa greke dhe tjetri me targa italiane.
Sipas informacioneve paraprake, automjeti me targa greke dyshohet se ka tentuar të kryejë një parakalim, por manovra ka rezultuar e pasigurt. Si pasojë, automjeti me targa italiane ka humbur kontrollin, ka dalë nga rruga dhe ka përfunduar në kanal.
Në automjetin me targa italiane udhëtonin tre persona, një çift bashkëshortësh dhe djali i tyre i rritur. Të tre janë transportuar me urgjencë drejt Spitalit të Lushnjës me dy autoambulanca, ku po marrin ndihmën e nevojshme mjekësore.
Në vendngjarje kanë mbërritur shërbimet e Policisë, të cilat kanë nisur hetimet për të zbardhur dinamikën e plotë të aksidentit, si dhe po menaxhojnë qarkullimin në këtë segment rrugor.
Aksi Pushimi i Shoferit–Fier Shegan konsiderohet një nga segmentet problematike për shkak të rrugës së ngushtë dhe fluksit të lartë të automjeteve, ndërsa në këtë zonë janë regjistruar edhe më parë aksidente rrugore.
Rrethanat e plota të ngjarjes mbeten ende nën hetim.