Administrata e Presidentit amerikan Donald Trump ka numrin më të lartë të zyrtarëve me pasuri të mëdha në historinë moderne të qeverisjes amerikane, me 57 zyrtarë që zotërojnë pasuri prej të paktën 100 milionë dollarësh. Sipas një raporti të organizatës së avokimit të konsumatorëve Public Citizen, të raportuar nga Associated Press, numri i personave me këtë nivel pasurie në administratën Trump është më shumë se katër herë më i lartë se totali i regjistruar së bashku gjatë administratave të tre presidentëve të mëparshëm.
Në total, 57 zyrtarë të administratës kanë pasuri prej të paktën 100 milionë dollarësh. Mes tyre janë 17 ambasadorë dhe 40 zyrtarë të nivelit të lartë.
Pasuria e jashtëzakonshme është e dukshme edhe brenda kabinetit presidencial. Tetë nga 23 anëtarët e kabinetit të Trump bëjnë pjesë në këtë kategori.
Mes tyre janë Sekretari i Tregtisë, Howard Lutnick, dhe Sekretarja e Arsimit, Linda McMahon, të dy miliarderë. Në listë përfshihen gjithashtu Zëvendës Sekretari i Mbrojtjes, Stephen Feinberg dhe Administratorja e Administratës së Bizneseve të Vogla, Kelly Loeffler, të cilët gjithashtu janë miliarderë. Sekretari i Thesarit, Scott Bessent dhe i Dërguari Special i SHBA-së, Steve Witkoff, kanë pasuri që vlerësohen në qindra miliona dollarë. Shifrat paraqesin një kontrast të fortë me administratat e mëparshme. Administratat e republikanit George W. Bush dhe demokratit Joe Biden kishin nga pesë anëtarë secila me pasuri neto prej të paktën 100 milionë dollarësh, ndërsa administrata e Barack Obamës kishte tre.
Trump, i cili vetë është miliarder, e ka justifikuar zgjedhjen e njerëzve jashtëzakonisht të pasur për poste të larta duke e paraqitur pasurinë si një tregues të suksesit financiar dhe menaxherial.
Megjithatë, përbërja e pasur e administratës së tij vjen në një moment kur presidenti amerikan po përballet me një elektorat gjithnjë e më kritik ndaj mënyrës se si po menaxhohet ekonomia amerikane. Top Channel