Presidentja e Sllovenisë Nataša Pirc Musar / Një aksident rrugor ku u përfshi presidentja e Sllovenisë, Nataša Pirc Musar, është shndërruar në një çështje politike me dyshime për lidhje me qarqet sekrete ruse. Në qendër të debatit është një prej grave që ndodheshin në makinën e saj, ndërsa opozita kërkon kufizimin e qasjes së presidentes në informacionet e klasifikuara... Një aksident rrugor i ndodhur më 31 korrik, është shndërruar me shpejtësi në një çështje politike, e cila nga dita në ditë po merr përmasa gjithnjë e më të mëdha. Rasti që lidhet me presidenten e Sllovenisë, Nataša Pirc Musar, fillimisht u trajtua si një aksident, më pas si një mister dhe tashmë po merr elemente të një historie me nuanca spiunazhi.
Pirc Musar mbeti e plagosur në një përplasje në tunelin Kastelec, ku u përfshinë dy automjete të eskortës. Presidentja pësoi një frakturë të klavikulës, ndërsa një person tjetër u plagos rëndë.
Në fillim, debati u përqendrua te fakti se presidentja nuk kishte vendosur rripin e sigurimit. Vetë Pirc Musar e pranoi publikisht këtë pas aksidentit, duke e cilësuar më vonë si një gabim të pafalshëm. Por vëmendja u zhvendos shpejt te personat që ndodheshin në makinën presidenciale.
Mes tyre ishin edhe disa mike të presidentes, përfshirë një grua me shtetësi sllovene dhe ruse, Victoria Krivolutskaya. Pikërisht emri i saj është kthyer në qendër të debatit politik në Slloveni.
Dyshimet u shtuan pas raportimeve të gazetës Dnevnik dhe agjencisë austriake APA, të cilat pretenduan se Krivolutskaya kishte pasur shumë vite më parë një lidhje me Roman Jeglič, një figurë e diskutueshme që kishte mbajtur poste të larta në aparatin e sigurisë slloven në vitet e para të pavarësisë së vendit.
Sipas agjencisë sllovene STA, Jeglič ishte përfshirë më herët edhe në një çështje që kishte pasoja të rëndësishme politike. Në vitin 1988, një kallëzim i lidhur me të çoi në arrestimin e kryeministrit të sotëm Janez Janša, i cili në atë kohë u akuzua për tradhti të lartë në kuadër të të ashtuquajturit “procesi JBTZ”.
Në vitet ’90, Jeglič u lidh gjithashtu me një skandal financiar të lidhur me një skemë piramidale që e tronditi Slloveninë. Pikërisht gjatë asaj periudhe ai u largua drejt Rusisë, ku sipas raportimeve të mediave, mori edhe shtetësinë ruse.
Atje, thuhet se u njoh me Krivolutskaya. Raportimet kanë nxjerrë në pah edhe një tjetër element interesant: Pirc Musar e ka vizituar Rusinë plot 7 herë që nga viti 2015, ndërsa udhëtimi i fundit u zhvillua vetëm disa muaj para nisjes së pushtimit rus të Ukrainës. Megjithatë, vetëm këto të dhëna nuk përbëjnë prova për ndonjë lidhje të presidentes me aktivitetet ruse. Zyra e Pirc Musar i ka hedhur poshtë me forcë insinuatat. “Presidentes i pëlqen të udhëtojë dhe ka vizituar rreth 80 vende të botës, përfshirë Rusinë”, ishte shpjegimi i saj.
Kabineti presidencial ka konfirmuar gjithashtu se Krivolutskaya është mike e Pirc Musar dhe se ajo ka shtetësi sllovene që prej vitit 2016. Por ka mohuar kategorikisht që presidentja të ketë njohur Jeglič. Sipas kabinetit, Krivolutskaya nuk ka pasur më kontakte me të prej rreth 15 vitesh.
Për momentin, nuk ka të dhëna që të tregojnë se Pirc Musar është përfshirë në ndonjë aktivitet të paligjshëm apo në ndonjë rrjet ndikimi rus. Megjithatë, rasti është bërë një mundësi e artë për kundërshtarët e saj politikë, të cilët po kërkojnë të ngrenë pikëpyetje mbi sigurinë dhe besueshmërinë e saj.
Ndër më aktivët është deputeti i partisë SDS të Janez Janšës, Žan Mahnič. Ai i ka paraqitur qeverisë një nismë parlamentare ku kërkon që presidentes Pirc Musar t’i kufizohet qasja në informacionet konfidenciale të shërbimeve sekrete sllovene.
Mahnič e ka argumentuar kërkesën me pretendimin se mund të ekzistojnë lidhje të mundshme me një rrjet ndikimi rus përmes Krivolutskaya. Nisma ka shkaktuar reagime të forta nga opozita dhe është konsideruar nga kundërshtarët politikë si një lëvizje provokuese.
Vetë Krivolutskaya i ka mohuar kategorikisht akuzat. Ajo ka deklaruar se nuk ka bashkëpunuar kurrë me organizata të huaja të inteligjencës dhe se raportimet që e lidhin me to e kanë lënduar thellë.
Krivolutskaya ka siguruar gjithashtu se Pirc Musar nuk ka ndarë kurrë me të dokumente të klasifikuara. Ajo ka sugjeruar se është shndërruar, pa dëshirën e saj, në “një armë kundër Natašës”.
Edhe ish-kryeministri Golob ka reaguar, duke i cilësuar akuzat ndaj presidentes si të pabaza. Sipas tij, është e papranueshme që Pirc Musar të sulmohet publikisht me akuza për spiunazh pa u paraqitur prova konkrete.
Ndërkohë, vëmendja është përqendruar te Komisioni Parlamentar për Mbikëqyrjen e Shërbimeve të Inteligjencës, Knovs, i cili pritet të mblidhet javën e ardhshme në një seancë të jashtëzakonshme.
Në tryezë do të jenë informacionet mbi ndikimet e mundshme të vendeve të treta,
veçanërisht Rusisë dhe Izraelit, në jetën politike të Lubjanës. Për këtë arsye, çështja e Victoria Krivolutskaya duket se mund të jetë vetëm fillimi i një debati shumë më të gjerë mbi ndikimin e huaj në politikën sllovene./Pamfleti nga “Il Piccolo”nataša pirc musar spiune e moskës Lini një Përgjigje Anuloje përgjigjen Rajoni dhe Bota Evropa në alarm, të paktën 35 mijë viktima nga i nxehti; 3 shtetet me bilancin më të rëndë 25 Gusht 2026, 11:5011:50Rajoni dhe Bota Pas 47 vitesh, SHBA heq Sirinë nga lista e shteteve sponsorizuese të terrorizmit 25 Gusht 2026, 10:4210:42Rajoni dhe Bota Çudira nga Irani, 10 mijë dele kurban për shëndetin e Mojtaba Khameneit! 25 Gusht 2026, 10:3110:31Rajoni dhe Bota Miliarda euro dëme, Europa përballë kostove të katastrofave klimatike 25 Gusht 2026, 09:2209:22Rajoni dhe Bota Irani sfidon sanksionet e reja të SHBA-së: Jemi gati, dimë si ta luajmë lojën 25 Gusht 2026, 08:5008:50Rajoni dhe Bota Superfuqitë po zbulojnë kufijtë e tyre 25 Gusht 2026, 07:4407:44Rajoni dhe Bota