Për rreth 20 orë, zjarrfikësit e Patosit janë përballur me flakët, duke punuar pa pushim për të vënë nën kontroll situatën dhe për të mbrojtur jetën e qytetarëve dhe pronat e tyre. Mes temperaturave të larta, tymit dhe lodhjes, ata kanë vijuar betejën në terren, duke treguar edhe një herë se puna e tyre kërkon sakrificë dhe përkushtim maksimal.
Në një moment pushimi, pamjet tregojnë zjarrfikësit teksa marrin energji me diçka fare të thjeshtë, pak bukë dhe djathë, përpara se t’u rikthehen flakëve. Një “vakt” modest, por që në këtë rast bëhet simbol i njerëzve që harrojnë lodhjen dhe nevojat e tyre për të qëndruar në shërbim të të tjerëve. “Bukë e djathë e shumë zemër” është ndoshta përshkrimi më i thjeshtë i kësaj sakrifice.
Këta janë njerëzit që hyjnë aty ku të tjerët largohen, duke rrezikuar veten për të shpëtuar të tjerët. 20 orë përballë zjarrit nuk janë thjesht një turn pune, por një provë e jashtëzakonshme fizike dhe njerëzore. Pamje të tilla sjellin sërish në vëmendje pyetjen: a po marrin zjarrfikësit mbështetjen, pajisjet dhe vlerësimin që meritojnë për punën dhe sakrificën e tyre?