Një 102-vjeçar ka humbur jetën në Uells pasi pësoi dëmtime të rënda gjatë një incidenti në një pub ku po performonte një grup muzikor. Rasti ka tërhequr vëmendjen e mediave britanike për moshën e pazakontë të viktimës dhe rrethanat e ngjarjes.
Phillip Ormerod, një klient i rregullt i pub-it Crow’s Nest në Cwmbran, u rrëzua nga skena mbrëmjen e 1 gushtit. Policia u thirr rreth orës 22:25, pas raportimeve se 102-vjeçari kishte rënë dhe ishte përplasur me dyshemenë.
Ormerod u dërgua në spital në gjendje kritike, por më vonë ndërroi jetë nga plagët e marra.
Sipas raportimeve të mediave britanike, policia po heton rrethanat e incidentit dhe ka trajtuar rastin si një sulm të dyshuar. Një burrë 56-vjeçar është arrestuar në kuadër të hetimit.
Djali i tij, Robert, tregoi se babai i tij ishte ende aktiv dhe shkonte në pub dy ose tri herë në javë, duke ecur rreth gjysmë milje nga shtëpia e tij. Ai ishte bërë një figurë e njohur për klientët më të rinj të lokalit, të cilët, sipas të birit, shpesh i blinin pije.
“Shpresojmë që të ketë drejtësi”, tha Roberti.
Phillip jetonte i vetëm në shtëpinë ku kishte banuar që prej vitit 1960, pas vdekjes së bashkëshortes rreth 40 vite më parë. Ai kishte dy fëmijë dhe kishte punuar si skicues projektues.
Vitet e fundit, shëndeti i tij ishte përkeqësuar. Shikimi i ishte dobësuar dhe ishte diagnostikuar me demencë dy ose tre vite më parë. Megjithatë, ai vazhdonte të ruante rutinën e tij dhe të shkonte rregullisht në pub.
Tashmë, familja pret që hetimi të zbardhë saktësisht se çfarë ndodhi në skenën e lokalit atë natë.
Rasti është raportuar nga disa prej mediave kryesore britanike, përfshirë The Guardian dhe The Times, duke e kthyer ngjarjen nga një incident lokal në një histori që ka tërhequr vëmendje edhe jashtë Uellsit.